सिड्नी — अष्ट्रेलियाली राष्ट्रिय प्रसारक एबीसी (ABC) ले रेडियो होस्ट एन्टोनेट लाटुफलाई ७० हजार अष्ट्रेलियन डलर क्षतिपूर्ति दिनुपर्ने भएको छ। संघीय अदालतले लाटुफको बर्खास्तगी अन्यायपूर्ण रहेको ठहर गर्दै उक्त क्षतिपूर्ति तिर्न आदेश दिएको हो।
लाटुफ सन् २०२३ को क्रिसमसअघि सिड्नीस्थित एबीसी रेडियोको ‘मार्निङ्स प्रोग्राम’ सञ्चालन गर्दै थिइन्। कार्यकालको दौरान उनले सामाजिक सञ्जालमा मानव अधिकार संस्था Human Rights Watch को एक पोस्ट सेयर गरेकी थिइन्, जसमा इजरायलले गाजामा “भोकमरीलाई युद्धको हतियारको रूपमा प्रयोग गरिरहेको” उल्लेख गरिएको थियो।
उक्त पोस्ट सार्वजनिक भएपछि एबीसीले लाटुफको अस्थायी नियुक्ति खारेज गरेको थियो। उक्त निर्णयविरुद्ध लाटुफले संघीय अदालतमा मुद्दा दायर गरेकी थिइन्। मंगलबार सुनाइएको फैसलामा न्यायाधीश ड्यारील रंगियाले उनको बर्खास्तगी अनुचित र पूर्वाग्रही रहेको भन्दै प्रारम्भिक रूपमा ७० हजार डलर क्षतिपूर्ति दिन आदेश दिएका हुन्।
अदालतले थप आर्थिक क्षतिपूर्ति वा अन्य कानुनी कारबाहीसम्बन्धी निर्णय आगामी सुनुवाइमा हुने जनाएको छ।
यो घटनाले अष्ट्रेलियामा सञ्चारकर्मीको अभिव्यक्ति स्वतन्त्रता र कार्यस्थलमा निष्पक्ष व्यवहारको विषयमा व्यापक बहस सिर्जना गरेको छ। सञ्चारमाध्यममा कार्यरत कर्मचारीले सामाजिक सञ्जालमा अभिव्यक्त गर्ने विचारको दायरा र नतिजाबारे पुनः विमर्श आवश्यक देखिएको विश्लेषकहरूले बताएका छन्।
फैसलापछि लाटुफले न्याय पाएको महसुस भएको प्रतिक्रिया दिएकी छन्। एबीसीले भने अहिलेसम्म अदालतको निर्णयबारे कुनै आधिकारिक टिप्पणी दिएको छैन।
