एडिलेड निवासी व्यवसायी तथा समाजसेवी आशिष वाग्लेले यस वर्ष पनि ‘विनी सीईओ स्लीपआउट’ (Vinnies CEO Sleepout) कार्यक्रममा सहभागी हुँदैछन्। जुन १९ तारिखको रात, उनी फेरि एकपटक खुला आकाशमुनि सुत्नेछन् ,बेघरको जीवनको अनुभूति लिने र उनीहरूको पक्षमा आवाज बुलन्द पार्ने उद्देश्यसाथ।
साउथ अस्ट्रेलियाको यो प्रतिष्ठित अभियानमा राज्यका प्रमुख नेतादेखि विभिन्न क्षेत्रका सीईओहरू सहभागी हुने गर्छन्। वाग्लेले यस अभियानमा विगत तीन वर्षमा करिब ११ हजार डलर संकलन गरी सेंट भिन्सेन्ट डे पउल सोसाइटी (St Vincent de Paul Society) मार्फत अस्ट्रेलियाका घरविहीनहरूलाई आपतकालीन आवास, खानपिन, स्वास्थ्य सेवा र अन्य सहायता उपलब्ध गराउन महत्वपूर्ण भूमिका खेलेका छन्। तर चुनौती अझै गहिरो छ। तथ्यांकले देखाउँछ ,हरेक रात करिब ७,५०० मानिस साउथ अस्ट्रेलियामै घरविहीन अवस्थामै बाँचिरहेका छन्। कोही सडकमा सुत्छन्, कोही अस्थायी र जोखिमपूर्ण आवासमा रात बिताउँछन्।
यसपालि वाग्लेले अझ ठूलो लक्ष्य लिएका छन् ,बढी रकम जुटाउने र तत्काल राहतसँगै दीर्घकालीन समाधानका कार्यक्रमहरूमा योगदान पुर्याउने। यी कार्यक्रमहरूमा शिक्षा, मानसिक स्वास्थ्य काउन्सेलिङ, तथा स्थायी आवास विकास समावेश छन्। वाग्ले भन्छन्, “घरविहीन हुनु कसैको व्यक्तिगत असफलता होइन, यो एक प्रणालीगत समस्या हो। समाधान सामूहिक प्रयासबाट मात्र सम्भव छ। म भाग्यमानी छु , मेरो घर छ, काम छ, र समुदायको साथ छ। तर हाम्रो वरिपरिका धेरै मानिसहरू ती आधारभूत सुविधाबाट बञ्चित छन्। यही असमानता महसुस गर्दा म यो अभियानमा होमिएको हुँ।” यस किसिमका सामाजिक अभियानहरू, जसमार्फत आशिष वाग्ले जस्ता व्यक्तिहरू सक्रिय भई समाजमा परिवर्तन ल्याउने प्रयास गरिरहेका छन्, त्यसले धेरैको जीवनमा आशाको किरण ल्याइरहेको छ। एक रात सडकमा सुत्नु केवल प्रतीकात्मक कार्य होइन , यो पीडाको अनुभूति हो। यस्तो अनुभवले संवेदना जगाउँछ, चेतना फैलाउँछ, र अन्ततः समाधानको बाटो खोल्न प्रेरित गर्छ।
हामी सबैको साझा जिम्मेवारी हो , कोही पनि घरविहीन नहोस् भन्ने सुनिश्चित गर्नु। वाग्लेको यो प्रयास त्यसै दिशातर्फको सशक्त कदम हो।
