अष्ट्रेलियाले अमेरिकी गाईको मासु आयातमाथिको पुरानो प्रतिबन्ध पूर्ण रूपमा हटाउने निर्णय गरेपछि राजनीतिक तहमा विवाद उत्पन्न भएको छ। विपक्षी नेशनल्स पार्टीले कृषि मन्त्री जुली कोलिन्समाथि वैज्ञानिक सल्लाहकार समूहसँग परामर्श नगरी निर्णय गरेको आरोप लगाउँदै संघीय संसदको सेनेट तहमा अनुसन्धानको माग अघि सारेको छ।
नेशनल्सका नेता डेभिड लिट्लप्राउडका अनुसार, मन्त्री कोलिन्सले बायोसेक्युरिटी निरीक्षक–महानिर्देशकको सिफारिसलाई बेवास्ता गरेकी छन्। उनले प्रश्न उठाउँदै भने, “मन्त्रीले किन आफ्नो निरीक्षक–महानिर्देशकको सल्लाहलाई नजरअन्दाज गरिन्? के यस्तो संवेदनशील निर्णय वैज्ञानिक प्रक्रिया बिना लिनु अष्ट्रेलियाको जैविक सुरक्षामा जोखिम होइन?”
पुरानो रोग, नयाँ निर्णय
अमेरिकाबाट गाईको मासु आयातमा २० वर्षअघि मैड काउ डिजिज फैलिएको घटनापछि प्रतिबन्ध लगाइएको थियो। सन् २०१९ मा क्यानडा वा मेक्सिकोमा पालन गरिएका गाई तर अमेरिका मार्फत वध गरिएका मासुमा आंशिक रूपमा प्रतिबन्ध हटाइएको थियो। अहिले अमेरिकाबाट गाईको मासुमा रहेको बाँकी प्रतिबन्ध पूर्ण रूपमा हटाइएको हो।
सरकारले भने उक्त निर्णय १० वर्षे वैज्ञानिक मूल्यांकनपछि गरिएको बताएको छ। मन्त्री कोलिन्सका अनुसार, “यो निर्णय वैज्ञानिक आधारमा गरिएको हो। मेरो विभागले दीर्घकालीन समीक्षा, जोखिम मूल्यांकन र विशेषज्ञताको आधारमा निर्णय गरेको हो। हामीले जैविक सुरक्षामा कुनै सम्झौता गरेका छैनौँ।”
तर विपक्षीहरूले त्यसमा विश्वास गर्न नसकेको प्रष्ट देखिएको छ।
वैज्ञानिक सल्लाहकार समूह नै निस्क्रिय?
बायोसेक्युरिटी निरीक्षक–महानिर्देशकले २८ मार्चमा प्रकाशित समीक्षा प्रतिवेदनमा वैज्ञानिक सल्लाहकार समूहको भूमिका थप स्पष्ट र सुदृढ बनाइनुपर्ने सिफारिस गरेका थिए। कृषि विभागले यस सिफारिसलाई स्वीकारेको भए पनि सो समूहको १.७ वर्षे कार्यकाल १ मार्चमै समाप्त भइसकेको थियो।
लिट्लप्राउडले भने, “यो निर्णयमा कुनै पियर रिभ्यु (peer review) छैन भन्ने देखिन्छ। यस्तो निर्णयमा स्वतन्त्र वैज्ञानिक पुनरावलोकन अनिवार्य छ।”
‘राजनीतिक स्वार्थ’ को आरोप
विपक्षले प्रधानमन्त्री एन्थनी अल्बनीजमाथि अमेरिकी राष्ट्रपति डोनाल्ड ट्रम्पसँग भेट सुनिश्चित गर्न यो निर्णय गरिएको आरोप पनि लगाएको छ। यद्यपि मन्त्री कोलिन्सले त्यसलाई “पूर्णतः गलत आरोप” भन्दै खारेज गरिसकेकी छन्।
पशुपालक संघको चिन्ता
Cattle Australia का प्रमुख कार्यकारी विल इभान्सले पनि स्वतन्त्र वैज्ञानिक पुनरावलोकनको माग गरेका छन्। “यति ठूलो निर्णयमा दोहोरो राय लिइनु आवश्यक छ,” उनले भने, “यो केवल बजारको कुरा होइन, यहाँ अष्ट्रेलियाको जैविक सुरक्षाको प्रश्न उठेको छ।”
सरकारले अमेरिकी मासु आयात खुला गर्ने निर्णयलाई वैज्ञानिक प्रक्रियाका आधारमा उचित भनेको छ, तर विपक्ष र पशुपालक संघहरूलाई पारदर्शिता, सल्लाहको अभाव, र समय मिलेन भन्ने विषयले चिन्तित बनाएको छ। अब हेर्न बाँकी छ — यो विषय सेनेट अनुसन्धान समितिसम्म पुग्नेछ कि मन्त्रिपरिषदमै टुंगिन्छ।
