ब्रिसबेन — अष्ट्रेलियाली अभिनेत्री तथा हलिउड सुपरस्टार मर्गोट रोबीलाई ब्रिसबेन २०३२ ओलम्पिक अघि आफ्नै राज्य क्विन्सल्याण्ड फर्काएर विशेष फिल्म निर्माण गर्ने योजना अघि सारिएको छ।
स्क्रिन क्विन्सल्याण्ड (Screen Queensland) ले “Barbie” स्टार मर्गोट रोबीलाई जन्मथलोमा फर्कन अनुरोध गर्दै, ओलम्पिकको सन्दर्भमा राज्यको अन्तर्राष्ट्रिय पहिचान बलियो बनाउने उद्देश्यले फिल्मको प्रस्ताव पठाएको जनाएको छ।
रोबीको जन्म गोल्ड कोस्टमा भएको हो। उनी अघिल्लो वर्ष पनि सोही स्थानमा आयोजित Australian Academy of Cinema and Television Arts (AACTA) Awards मा Trailblazer Award ग्रहण गर्न फर्किएकी थिइन्।
हाल व्यस्त कार्यक्रमहरूमा संलग्न रोबीलाई राज्यमा पुनः फिल्म निर्माणमा सहभागी गराउन उनीको चासो हुनेजस्तो गम्भीर र सशक्त स्क्रिप्ट र परियोजना आवश्यक पर्ने कुरामा फिल्म उद्योगका विश्लेषकहरू सहमत छन्।
ब्रिसबेन २०३२ ओलम्पिकलाई क्विन्सल्याण्डको फिल्म तथा रचनात्मक उद्योगलाई विश्वमञ्चमा अगाडि ल्याउने सुनौलो अवसरको रूपमा लिइँदै आएको छ। त्यसैले स्क्रिन क्विन्सल्याण्डले रोबीकै प्रोडक्सन कम्पनी LuckyChap Entertainment मार्फत फिल्म निर्माण गर्न प्रस्ताव अघि सारेको हो।
यदि यो योजना कार्यान्वयनमा आयो भने, यसले क्विन्सल्याण्डको सिनेमा उद्योगलाई विश्वव्यापी स्तरमा स्थापित गर्ने र स्थानीय प्रतिभा तथा पर्यटन प्रवर्द्धनमा समेत सकारात्मक प्रभाव पार्ने विश्वास गरिएको छ।
ओलम्पिकसँगै सांस्कृतिक र सिर्जनात्मक उद्योगलाई जोड्ने यो प्रयासले अष्ट्रेलियाली सिनेमा र मनोरञ्जन क्षेत्रमा दीर्घकालीन प्रभाव पार्न सक्ने अपेक्षा गरिएको छ।
