नेपाली समुदायको साझा सपना ग्रेटर सिड्नी नेपाली बहुसांस्कृतिक केन्द्र निर्माणका लागि आगामी अगस्ट २९ देखि ३१ सम्म सिड्नीमा ‘आध्यात्मिक महोत्सव २०२५’ को आयोजना गरिने भएको छ। यसबारे विस्तृत जानकारी मेरिल्यान्ड्सस्थित बार्दली फंक्सन सेन्टरमा आयोजित पत्रकार सम्मेलनमार्फत सार्वजनिक गरिएको हो। कार्यक्रमका प्रमुख आकर्षणका रूपमा नेपालबाट ख्यातिप्राप्त आध्यात्मिक व्यक्तित्व दिनबन्धु पोखरेल महोत्सवमा सहभागी हुनेछन् भने सिड्नीका बौद्ध धर्मगुरुहरूको पनि उपस्थित हुने पुष्टि भएको छ।
संस्थाका अध्यक्ष विष्णु हमालले महोत्सव नेपाली बहुसांस्कृतिक केन्द्रको निर्माणको थालनीमात्र नभई, दीर्घकालीन संरचना निर्माणको मेरुदण्डसमेत हुने बताएका छन्। उनले समुदायका सदस्यहरूलाई पारिवारिक आजीवन सदस्यता ग्रहण गर्न आग्रह गर्दै, व्यवसायीहरूलाई पनि क्षमता अनुसार आर्थिक सहयोग र प्रायोजनमार्फत साथ दिन अनुरोध गरे। हालसम्म ‘मार्क क्यू होम्स’ ले मुख्य प्रायोजकको भूमिका निर्वाह गर्ने सहमति जनाइसकेको छ भने ‘अजी फाइनान्स एण्ड होम लोन्स’ र ‘एक्सपर्ट एजुकेशन एण्ड भिसा सर्भिसेस’ ले प्लाटिनम प्रायोजनका लागि प्रतिबद्धता जनाएका छन्।
महोत्सवको पहिलो दिन विशेष ‘कलश यात्रा’ आयोजना गरिनेछ, जसमा सिड्नीस्थित नेपाली महिला दिदीबहिनीहरूको उल्लेखनीय सहभागिता रहनेछ। यस धार्मिक यात्राको संयोजन केन्द्रकी सचिव मीना शर्माले गर्नेछिन्। १००८ कलशसहितको यात्रालाई पवित्र र सामूहिक संकल्पको प्रतीकका रूपमा लिइएको छ र इच्छुक सहभागीहरूका लागि दर्ता खुला गरिएको जानकारी दिइएको छ। सचिव शर्माका अनुसार यो यात्रा केवल धार्मिक मात्र नभई नेपाली समुदायको पहिचान र एकताको बलियो सन्देश पनि हो। उनले सिड्नीमा नेपाली बहुसांस्कृतिक केन्द्र स्थापना गर्ने संकल्पमा सबैलाई सहभागी हुन आह्वान गरेकी छिन्।
कार्यक्रममा संस्थाका महासचिव डा. प्रकाश पौडेलको संयोजनमा अध्यक्ष विष्णु हमाल, उपाध्यक्ष उमेश पन्त लगायतका पदाधिकारीहरूले पत्रकारहरूको जिज्ञासाको जवाफ दिएका थिए। सम्मेलनमा महोत्सवको उद्देश्य, हालसम्मको तयारी र आगामी योजनाहरूबारे पनि स्पष्ट जानकारी प्रदान गरिएको थियो।
यो केन्द्र भविष्यका पुस्ताहरूले आफ्नो पहिचान र गौरवका रूपमा आत्मसात गर्ने, समयानुकूल परिष्कृत हुँदै जाने एउटा ऐतिहासिक सम्पदा हुने विश्वास आयोजकले व्यक्त गरेका छन्।
