मेलबर्न, अष्ट्रेलिया —
गैरआवासीय नेपाली संघ (एनआरएनए) अष्ट्रेलियाको आगामी निर्वाचन नजिकिँदै गर्दा मेलबर्नमा एक विवादास्पद घटना सार्वजनिक भएको छ। एनआरएन निर्वाचनसँग सम्बन्धित एक उम्मेदवारद्वारा आक्रमण गरिएको आरोप लगाउँदै सिजन खड्काले प्रहरीमा औपचारिक उजुरी दिएका छन्।
उनका अनुसार घटना मेलबर्नको ग्लेनरोयस्थित एक हेयर सैलुनबाहिर आइतबार दिउँसो करिब १ बजे भएको हो। “म केही कामका लागि गएको थिएँ, ती उम्मेदवार केही युवासहित आएर मलाई एक्कासि कुटपिट गरे,” खड्काले केविसी खबरसँग भने, “म ती व्यक्तिलाई चिन्दिनँ। किन आक्रमण भयो भन्ने पनि थाहा छैन।”
उनका अनुसार आक्रमणका क्रममा कानको पछाडिबाट रगत बग्यो, उपचारपछि उनी आफैँ प्रहरी कार्यालय पुगेका थिए र घटनाबारे बयान दिएका थिए।
घटनापछि तुरुन्तै प्रहरी बोलाइएको थियो। भिक्टोरिया प्रहरीले घटनाको पुष्टि गर्दै लालोर निवासी २९ वर्षीय एक युवकलाई नियन्त्रणमा लिएर सोधपुछ गरिएको र पछि रिहा गरिएको जनाएको छ। हाल घटनाको अनुसन्धान जारी छ भने थप प्रमाणहरू संकलन भइरहेका छन्। प्रहरी प्रशासनले प्रत्यक्षदर्शीहरू वा घटनासँग सम्बन्धित भिडियो वा अन्य प्रमाण भएका व्यक्तिहरूलाई Crime Stoppers – 1800 333 000 मा सम्पर्क गर्न आग्रह गरेको छ।
सिजन खड्काले उक्त घटनासम्बन्धी उजुरी एनआरएनए अष्ट्रेलियाको निर्वाचन आयोगमा पनि दिएका छन्। प्रमुख निर्वाचन आयुक्त डिल्ली ढकालले उजुरी प्राप्त भएको पुष्टि गर्दै भनेका छन्, “मैले सम्बन्धित राज्य निर्वाचन आयुक्तसँग विस्तृत विवरण मागेको छु। घटनाबारे अनुसन्धान भइरहेको छ, खड्का जीलाई स्वास्थ्य र सुरक्षामा विशेष ध्यान दिन भनेको छु।”
चुनावको मिति नजिकिँदै गर्दा यस्तो प्रकारको घटना हुनु गम्भीर विषय मानिएको छ। यसले एनआरएनए अष्ट्रेलियाको चुनावी वातावरणलाई थप तातो बनाएको देखिन्छ।
