वेस्ट्रन अष्ट्रेलियामा आगामी डिसेम्बर १ देखि रेड पी-प्लेट चालकलाई एकजनाभन्दा बढी यात्रु राख्न प्रतिबन्ध लगाइने भएको छ। “टम्स ल” नाम दिइएको यो नयाँ नियम टम साफीओटीकी आमा सामन्था साफीओटीको अभियानपछि आएको हो, जसका छोरा टमको २०२१ मा एक पी-प्लेट चालकद्वारा संचालित गाडीमा भएको दुर्घटनामा निधन भएको थियो। सडक सुरक्षाका लागि नयाँ नियमको घोषणा गरिएको हो, जसमा सरकार र विपक्ष दुवैको समर्थन छ।
हालसम्म, पश्चिमी (western ) अष्ट्रेलिया र उत्तरी ( North ) क्षेत्र मात्र यस्तो क्षेत्र हुन्, जहाँ पी-प्लेट चालकलाई यात्रु संख्या सम्बन्धी कुनै पनि प्रतिबन्ध छैन। पश्चिमी अष्ट्रेलियामा रेड पी-प्लेट लिने भनेको सवारी चालक अनुमति पत्रको प्रारम्भिक चरण हो, जसलाई कम्तिमा १७ वर्ष उमेरका र ड्राइभिङ परीक्षण पास गरेका चालकले पाउने व्यवस्था छ। यी चालकहरूलाई राति १२ बजे देखि बिहान ५ बजे सम्म गाडी चलाउन अनुमति छैन, जुन नियम दक्षिण (South ) अष्ट्रेलियामा पनि लागू छ। त्यस्तै, पश्चिमी अष्ट्रेलियामा रेड पी-प्लेट चालकले ६ महिनापछि ग्रीन पी-प्लेटमा रूपान्तरण गर्न पाउँछन्, जुन अन्य राज्यहरूभन्दा छिटो छ।
“टम्स ल” अन्तर्गत रेड पी-प्लेट चालकलाई एकजनामात्र यात्रु राख्न अनुमति दिइनेछ, तर केही विशेष अवस्थामा भने छुट दिइनेछ। तत्कालिन परिवारका सदस्यलाई यात्रु राख्न, चार वर्षभन्दा बढी समयदेखि पूर्ण अनुमति पत्र लिएका व्यक्तिहरूलाई यात्रु राख्न, र काम सम्बन्धी आवश्यकतामा आधिकारिक पत्र भएमा चालकले बढी यात्रु राख्न सक्नेछन्। नयाँ नियम उल्लङ्घन गर्नेलाई $२०० जरिवाना र दुई डिमेरिट प्वाइन्टको सजाय दिइनेछ।
पश्चिमी अष्ट्रेलियाका प्रिमियर रोजर कुकले यी नियमहरूको उद्देश्य युवा र अनुभवहीन चालकहरूको सुरक्षामा सुधार गर्नु रहेको बताउनुभयो, जसले जटिल सडक परिस्थितिमा कमजोर मानिन्छन्। राज्यका विपक्षी नेता सेन लभले पनि यसलाई सडक सुरक्षामा सुधार ल्याउन आवश्यक कदमको रूपमा समर्थन गरेका छन्।
यो नियमको नाम टम साफीओटीबाट लिइएको हो, जसको निधन २०२१ मा पर्थको दक्षिणपूर्वमा भएको दुर्घटनामा भएको थियो। टम र उनका साथी मार्क बोगोनी १८ वर्षीय पी-प्लेट चालकको गाडीमा पाँच जना यात्रुहरू मध्येका थिए। सामन्था साफीओटीले सरकारलाई यस्तो प्रतिबन्ध लागू गर्न आग्रह गर्दै आफ्नो छोराको जस्तै घटनाबाट अरूलाई जोगाउन कदम चाल्न आवश्यक रहेको बताइन्।
