अष्ट्रेलियाको मेलबर्नस्थित वान्टिर्ना साउथमा प्लेग्राउन्ड नजिक एक समूह पैदल यात्रुलाई गाडीले ठक्कर दिँदा दोस्रो व्यक्तिको ज्यान गएको पुष्टि भएको छ।
गत बिहीबार (१२:२० दिउँसो, AEST) कोलम्यान रोडमा भएको यस दुःखद घटनामा प्रहरीका अनुसार ९१ वर्षीया महिला चालकले चलाएको टोयोटा यारिस कारले नियन्त्रण गुमाउँदै बार भत्काएर करिब ५० मिटर दूरी पार गरी पार्क बेञ्चमा गएर रोकिएको थियो।
दुर्घटनामा ५९ वर्षीया महिलाको घटनास्थलमै मृत्यु भएको थियो भने ६० वर्षीय पुरुष गम्भीर घाइते भएका थिए। ती पुरुषको पछिल्लो दिनमा उपचारकै क्रममा अस्पतालमा मृत्यु भएको प्रहरीले पुष्टि गरेको छ। घटनामा एक दुई वर्षीय बालक पनि गम्भीर घाइते भएका छन्, जसको उपचार भइरहेको छ।
प्रहरीका अनुसार चालकलाई सामान्य चोटपटक लागेको छ र उहाँ अहिले अस्पतालमा उपचाररत हुनुहुन्छ। उहाँसँग हालसम्म सोधपुछ गरिएको छैन र दुर्घटनाको विस्तृत अनुसन्धान जारी रहेको बताइएको छ।
सुपरिन्टेन्डेन्ट जस्टिन गोल्डस्मिथका अनुसार, “हामीसँग चालकबाट अझै धेरै जानकारी प्राप्त भएको छैन। उहाँ मानसिक रूपमा निकै आहत हुनुहुन्छ, त्यसैले प्रारम्भिकरूपमा अस्पतालमा परीक्षणका लागि लगिएको हो।”
प्रहरीले प्रारम्भिक रूपमा अनुमान गरेको छ कि गाडी करिब ५० मिटर अनियन्त्रित रुपमा गुडेपछि फुटपाथ चढ्दै पैदल यात्रीहरू — एक महिला, एक पुरुष र एक बालक — लाई पछाडिबाट ठक्कर दिएको थियो।
सडक छेउको पार्कमा राखिएको खेल सामाग्री नजिकै गाडी ठोक्किएको दृश्य ड्रोन फुटेजमार्फत देखिएको छ, जहाँ आपतकालीन सेवाले गाडी ढाक्नका लागि टेन्ट राखेको दृश्य देखिएको थियो।
हालसम्म यो स्पष्ट भएको छैन कि चालकलाई स्वास्थ्यसम्बन्धी आकस्मिक समस्या (medical episode) आएको थियो वा गति नै मुख्य कारण थियो। “हामीसँग यथेष्ट प्रमाण छैन कि तीव्र गति दुर्घटनाको कारक थियो,” सुपरिन्टेन्डेन्ट गोल्डस्मिथले स्पष्ट पार्नुभयो।
प्रहरीले सो घटनालाई देखेका, ड्यासक्याम फुटेज भएको वा अन्य कुनै पनि जानकारी राख्ने व्यक्तिहरूलाई Crime Stoppers को 1800 333 000 मा सम्पर्क गर्न वा गोप्य रूपमा www.crimestoppersvic.com.au मा प्रतिवेदन दिन आग्रह गरेको छ।
यो घटना वृद्ध चालक र सडक सुरक्षासम्बन्धी नियमनबारे पुनः बहसको विषय बन्न सक्ने अनुमान गरिएको छ।
